Weihnachtstön

(T.+M.: F.M.Willizil)

Verlag: Dabbelju

 

Kutt eren, dä Baum, dä brennt

wie lang nit mih esu schön

laut erklinge noh un fän

die wunderschöne Weihnachtstön

 

All die Kääze leuchten hell – die Jeschenke, se waaden stell

mir Pänz sin opjerääch en’t Wonnzimmer jesprunge

ming kleine Schwester Klör un ich jöcken flöck zom Jabendesch

doch do röf dr Papp: „Halt!! – Eets weed jesunge.“

 

Un dann singe mr esu schön unger’m Tannejrön

die ahl vertraute Weihnachtstön

„Ihr Kinderlein kommet, oh kommet doch all ....“

 

De janze Stuff es met Verwandschaff voll – Oma schnarch ald em Schöckelstohl

Tant Billa seufz: „Hach, wat es dat Fess widder jelunge!“

se käuen op de Printe un nüggele dr Sekt – un als ich jrad mi neu Fahrrad entdeck

do röf dr Papp ald widder: „Halt!! – Eets weed jesunge.“

 

Un dann singe mr .....

 

Dr Papp hät de eetste Fläsch Asbach jeköpp – schon komisch, dat sich hück jakeiner klöpp

et Klörche hät si Jeschenk noch immer nit jefunge

„Ich weiss jenau, irjendwo han ich et dochhinjetan,“ sät de Mamm - ich maach dr Fernseher an

do lallt dä Ahl ald widder: „Halt!! – Eets weed jesunge.“- un schlöf en.

 

Met dr Zick weed us Verwandte widder Pöbel – dat Dröck hät medden en de Krepp jejöbelt

Ühm Hein knurrt: „Wo es dat Ros bloss entsprunge??“

Et Klörche pennt, de Oma weed wach: „Och, es ald widder Hillije Naach?!“

dodrop dr Papp: „Ah – jo – - äh –äh – singe!“

 

Un dann singe mr .....

 

Elf Uhr vörbei, jetz weed noch frisch en dr Kirch de Chrissmess opjemisch 

nä, wat hät de Orjel wunderschön jeklunge

Papp sät: „Mamm, ich k-kann nit mih – tschöö met öö - bes morje fröh ...“

do röf dr Pastur: „Halt, mein Sohn!! – Erst wird jesungen!“

Un dann singe mr esu schön unger’m Tannejrön

die ahl vertraute Weihnachtstön.